Bhakti Kavya: श्रीभट्ट की बेहतरीन भक्ति रचना, 'राधा माधव अद्भुत जोरी'

राधा माधव अद्भुत जोरी ।

राधा माधव अद्भुत जोरी ।
सदा सनातन इक रस विहरत अविचल नवल किशोर किशोरी।
नख सिख सब सुषमा रतनागर,भरत रसिक वर हृदय सरोरी।
जै श्रीभट्ट कटक कर कुंडल गंडवलय मिली लसत किशोरी।।

अन्य रचनाएं भी पढ़ें...
_____

जुगलकिशोर हमारे ठाकुर। 

सदा-सर्वदा हम जिनके हैं, जनम-जनम घर-जाय चाकर॥ 

चूक परैं परिहरैं न कबहूँ, सबहीं भाँति दया के आकर। 

जै ‘श्रीभट्ट’ प्रगट त्रिभुवन में प्रनतनि पोषत परम-सुधाकर॥ 
____

ब्रजभूमि मोहिनी मैं जानी। 

मोहन कुंज, मोहन बृंदावन, मोहन जमुना-पानी॥ 

मोहन नारि सकल गोकुल की, बोलति अमरित बानी। 

‘श्रीभट्ट’ के प्रभु मोहन नागर, मोहनि राधारानी॥ 
____

मदनगुपाल, सरन तेरी आयो। 

चरनकमल को सरन दीजिये, चेरौ करि राखौं घर-जायो॥ 

धनि-धनि माता-पिता सुत बंधु धनि, जननी जिन गोद खिलायो। 

धनि-धनि चलन चलत तीरथ की, धनि गुरुजन हरिनाम सुनायो॥ 

जे नर बिमुख भये गोविंद सों, जनम अनेक महादुख पायो। 

‘श्रीभट्ट’ के प्रभु दियौ अभय पद जम डरप्यौ जब दास कहायो॥

Note- रचनाएं पढ़ने के लिए धन्यवाद, अगर आप भी भक्ति काव्य पर अपनी रचनाएं लिखते हैं तो हमें मेल करें। infomerasanatan@gmail.com